ቅዱስ ሲኖዶስ ዓለም-ለኻዊ ቤተክርስትያን ኦርቶዶክስ፡ ፓትርያርክ እንጦንዮስ ናብ ቦትኦም ኪምለሱ ይሓትት

ቅዱስ ሲኖዶስ ዓለም-ለኻዊ ቤተክርስትያን ኦርቶዶክስ፡ ፓትርያርክ እንጦንዮስ ናብ ቦትኦም ኪምለሱ ይሓትት

ቅዱስ ሲኖዶስ ዓለም-ለኻዊ ቤተክርስትያን ኦርቶዶክስ፡ 3ይ ፓትርያርክ ቅዱስ ኣቡነ እንጦንዮስ ናብ ቦትኦም ኪምለሱ ኣብ ዝግበር ጻውዒት ድምጹ ብምሕዋስ ነቲ ዝተገብረ ግህሰት ኮኒኑ።

ሓሙስ ዕለት 19 ጥሪ, 2012 ብኣቆጻጽራ ፈረንጂ ኣብ ዘውጽኦ መግለጺ ነቲ ኣብ ርእሲ ቅዱስ ኣቡነ እንጦንዮስ ዝተፈጸመ ገበን ኣዝዩ ዘሕዝን እዩ ብምባል ገሊጹ። ንዝሓለፈ ሽዱሽተ ዓመታት ንፓትርያርክ ኤርትራ ኣቡነ እንጦንዮስ ኣብዘይተፈልጠ ቦታ ኪሕየሩ ምግባር ኣረሜናዊ ተግባር ምዃኑ ድሕሪ ምሕባር መንግስቲ ኤርትራ ንውሳኔኡ ዳግመ ግምት ኪገብረሉ ኣዘኻኺሩ። ብተወሳኺ ኣብ ኩሉ ዓለም ንዘሎዉ ክርስትያንን መራሕትን ነዚ ኣብ ቤተክርስትያን ኤርትራ ዝፍጸም ዘሎ ዕንወት ብሓባር ድምጾም ከስምዑን፡ ነዚ ጉዳይ ኣብ ናይ ዓለም ለኻዊ ቤት ፍርዲ ከቕርብዎን ጸዊዑ።

ናጽነት ኣምልኾ ኣድማሳዊ መሰል ወዲ ሰብ ብምዃኑ ነቶም ብምኽንያት እምነቶም ዝተኣስሩ ብዙሓት ሰዓብቲ ንኣሽቱ ማሕበራትውን ነጻ ኪልቐቑ ኣዘኻኺሩ።